وهذه تدوينة منال عبد القوي التي نشرتها على صفحتها بالفايسبوك:

"عفوا سيّدي الرئيس عندي كليمتين بنقولهملك :

القرارات الي أعلنت عليها اليوم تخصّ المرأة البرجوازيّة اللي مشكلتها الإرث هي وخوها وانها تاخذ راجل مش مسلم… وينهم القرارات لصالح المرا الزوّالية اللي تجني في الطماطم والفلفل والعنب بـ5 و7 الاف في النهار؟؟؟ وتتقلب بيها الكميونة الخردة اللي هازتها مالفجورات بش تروّح في المغارب؟؟؟ وينهم القرارات للمنظّفة والمعينة المنزلية لي ياكلولها عرقها وجهدها وعمرها ويعتديو عليها جسديا وجنسيا؟؟؟ وينهم القرارات للمرا اللي عندها اولاد معاقين ولا مرضى وماعندهاش كرني باش تعالجهم؟؟؟ وينهم القرارات للمرا اللي تخلص عالحضيرة وبنت المعمل اللي ظهرها يتقسم وعينيها تتنقب ويديها تحلّف باش تخلص 300 دينار؟؟؟

وينهم القرارات للمرا العزوزة اللي تاخو في شهرية شيخوخة 100 دينار؟؟؟

وينهم القرارات للمرا اللي ما عرّستش لين كبرت ولا عرست ولوحوها اولادها ولا ما عندهاش اولاد وما نجمتش تلتحق بمركز مسنّين؟؟؟

وينهم القرارات للمرا اللي تتعرّض كل صباح بكري للبراكاجات والتشليط ؟؟

وينهم القرارات للفنانات اللي مرضو وما لقاوش باش يعالجو كيف منية الورتاني وسعيدة سراي وغيرهم.. قراراتك ما فرّحتنيش ياسر سيدي الرئيس خاطر ما تعنينيش كانك عالإرث عمري انا وخواتي لا حكينا ولا خممّنا حتى باش نتفارقو ونتقاسمو رزق بابا مشا هو خلّي يا طرف ارض وزيتون؟؟؟ يرّاااه وحتى كان جا هاك النهار عمرنا ما باش نختلفو ولا نتعاركو على وسخ دار الدنيا هكّة مبروك القوي وبوه علي القوي رباونا…

وكانك عالقاوري خوذو انت وخيّ انا مرا مسلمة وما ناخذ كان مسلم كيفي كيفو اك اللي ينجّمو أصحابي الحداثيين يسميوني من برّه من برّه حداثية ومن داخل خوانجية ميسالش هذي قناعاتي نحبو مسلم ويا ريت تونسي

ويا ريت جربي زادة باهيشي هكّة؟؟؟؟؟؟؟ نطّقتني سيدي الرئيس وانت تاخذ في قراراتك في برجك العاجي أهبط للارياف وين الثلج يغطّي الاكواخ في الشتا والشمس تقتل الكبار في الصيف، وين الراجل يبدى قاعد يلعب في الكارطة في القهوة ومرتو تخدم وكي يجي كميون الغاز يبعث ولدو يقلو برا قول لأمك تجي تهز دبوزة القاز…. برّا اعمل دورة في شوارع تونس في الليل تو تشوف قداش من مرا تاكل مالزبلة وراقدة على كردونة..

زيد ثبّت تو تشوف قداش من بنيّة قاصر تخدم ولا تدور برضيع جاباتو بعد ما شدّها ولد حرام عدّاها عليها وهرب…

عفوا سيدي الرئيس البرجوازي.. زيد بربش في مشاكل المرا التونسية تو تلقى ما يندّب الوجه فبحيث يا ناري عتونس وبرّه".