سياسة

بن مبارك.. "في بلاد العجايب تتهكّم على السلطة مايكلمك حدّ تتهكم على "قبيلة النوفمبرية" ينكّلو بيك"

زووم تونيزيا | الخميس، 6 أوت، 2020 على الساعة 21:47 | عدد الزيارات : 3015
زووم - قال جوهر بن مبارك اليوم ،الخميس 6 أوت، أنّ الممثّل والكوميدي لطفي العبدلي كان ومازال يحبّ الضحكة وينقد المشهد السياسي التونسي بكل أطيافة.

 

ونشر بن مبارك تدوينة فايسبوكية يساند فيها العبدلّي وينتقد فيها ردود أفعال أنصار "عبير النوفمبرية" حسب قوله.

 

وفي مايلي نصّ التدوينة:

 

"لطفي العبدلي خرّج فيديو قال فيها dégage لبن علي وقت اللّي الرهوط اللّي يسبّو في لطفي اليوم و ينددو و يستنكرو مازالو يزمّرو بكراهبهم ترحيبا بخطاب "غلطوني"الشهير. لطفي العبدلي قال اللي ما يتقالش في المرزوقي وقت المرزوقي رئيس للجمهورية. لطفي العبدلي عمل مسرحيات كاملة تهكّم فيها على الغنوشي و النهضة وقت اللي كانت النهضة تحكم في البلاد و في يدها الحكومة. لطفي العبدلي ضحّك الناس على الباجي قايد السبسي و هو زادة رئيس البلاد و يوسف الشاهد وهو رئيس حكومة و نداء تونس وهو في السلطة وعندو عشرة سنين ماخلّاش حاجة ما قالهاش في السياسين و الوزراء و النوّاب الكل بدون إقصاء عمل هذا الكل و قال هذا الكل في الناس الكل و ما صارتلوش هرسلة كيما صارت وقت تهكّم على "عبير النوفمبرية".

 

بصراحة ها الشي لا ريتو لا في الاستبداد و لا في الديموقراطية على خاطر في الاستبداد وقت تتهكّم على السلطة ينكلو بيك: اسمها جريمة ثلب الحاصل "يثلبولك" جلدك على جرد كلمة.

 

في الديمقراطية برّا امورك ضحّك خلق ربّي على خلق ربّي ما يدور بيك حدّ: اسمها حرية التعبير العظيمة.

 

امّا في بلاد العجايب وقت تتهكّم على السلطة و الرياس و الوزرة و المسؤولين مايكلمك حدّ تقولش عليك في بلاد ديمقراطية و حريّة امّا وقت تتهكم على "قبيلة النوفمبرية" و "رمزتهم" ينكلو بيك و ماذابيهم يعملو بيك دورة في "البناية الرمادية" كي عادتهم و كأنك في بلاد استبداد و قمع. ياخي دولة في الدولة أو تداخل أزمنة؟ ولا شنية الحكاية!!

 

صديقي نعرفك ما يرجّعك حد و ما يكبر في عينك حدّ على خاطر انت تحب الضحكة و الضحكة تحب الصدق.