وفي مايلي نص القصيدة:

* “صحيّن تونسي”*
( نصائح..وتطمينات ليوسف الشاهد قبيل تشكيل الحكومة)
*************************
“الشاهد”…يا “الشاهد”..يا “الشاهد”…
” أحنا معاك “..وربّي شاهد..
ها الحكومة التونسية..
عملت لينا الحساسية..!!
شكّلْها…بربّي يزّينا ..
من خُطاك ” الخنفوسيّة”..
وهاذي نصا يح تبّعها..
في الخطوط الرئيسية..
…………….
أوّلًا..بالك لا تغفل ..
عَ الأوامر “السبسيّة”..
و”صندوق النقد “الْ يرعانا..
والحماية الأطلسية..
وما تنسى الّلي صار ل”جعفر”..
في الخلافة العباسية.. ؟!!
……………..
..سَمّي ..”وزيرة فرنسية..
من أصولٍ تونسية “..!!
وابعد عَ “الرحوي ” وأمثالو..
وخصوصًا..”عمروسية “..!!!
..وتَنوشْها..ب”الصّلعْ ” الزّوز..
واحد بندق..لاخر لوز..!!
وتونسنا راهي معروفة
ب”الصحون التونسية”..!!
…………………..
وما تغضّب لينا السرّاق..
هوما السلوى للعشّاق..!
يحبّوا تونس مِ الأعماق..!
وهوما “الرّوح القُدُسية”..!!!
..بيهم يصلح الاقتصاد
ويصبح طالع كالمنطاد..!
وخيرات بلادي ما تضيع..
ونحقّق بيها التصنيع..!
وتزدهر الفلاحة..
وتولّي “البصلة” “تفاحة”..!!
..وبالأشغال الهندسية..
نمد البُنية الأساسية..!
..والسياحة التونسية..
تحرّكْها…..” .. روسيّة “..!!!
..وبالدعوات والتهليل..
نحلّو مشكل التشغيل..
والحل الأمثل في با لي..
نولّو الكلّة…بوليسيّة…!!!
…………………..
..ويتطوّر قطاع الصحة..
لا “بوصفّبر”..ولا “كحّة”..!
و”اللوالب القلبية”..
في الألعاب الأولمبية..
ونرجع “للعصر البرونزي”
في عهد “الفترة السبسيّة”..!!
…………………
وما نخافوش على التعليم..
“جلّول ” ينجّح البهيم..!
وحل الأزمة المدرسية..
بالدروس الخصوصية..!!
…………………
وكثّر م “المزود” و”الطّبلة”
في بلاد الزطلة والهبلة..
وللحكومة..نديرو حفلة..
..بالفرق النحاسية..!!
وتتنظّف تونس مِ الزبلة..
وترجع خضرا سُندسيّة..!!
………………….
و” علّوشك ” يجيك موَصّل..
مشوي…من ” خالتي ساسيّة”…!!!!